Nisutoy si Jasper Philipsen sa sprint finish aron makuha ang unang hugna sa Tour de France, samtang ang defending champion nga si Tadej Pogačar luwas nga nakahuman niadtong Dominggo, Hulyo 6 (PH time) didto sa France.
Ang Stage 1 milahutay og 185 kilometros nga rota palibot sa siyudad sa Lille, nga nahimutang sa amihanang bahin sa France.
Si Mathieu van der Poel, kauban ni Philipsen sa Alpecin-Deceuninck team, maoy nagtulod kaniya sa maayong posisyon sa katapusang 100 metros, hinungdan nga nikabuylo si Philipsen sa ilang mga kontra ug gikuha ang iyang ika-10 nga stage win sa Tour de France.
Sa unang higayon, gisul-ob ni Philipsen ang yellow jersey.
Ang ikaduhang pwesto nakuha ni Biniam Girmay, samtang nakakompleto sa top 3 ang Norwegian rider nga si Søren Wærenskjold.
Samtang, si Pogačar nagponterya sa iyang ikaupat nga titulo sa maong lumba. / RSC