Nasubhan og masakit nga kapildihan ang Gilas Pilipinas batok sa Chinese Taipei, 95-87, sa pagsugod sa ilang kampanya sa Fiba Asia Cup niadtong Miyerkules sa kadlawon, Agusto 6, 2025 (PH time), sa King Abdullah Sports City sa Jeddah, Saudi Arabia.
Ang Gilas gipangulohan ni Justin Brownlee pinaagi sa iyang 19 puntos ug pito ka rebounds apan na-foul out siya sa tungatungang bahin sa 4th quarter.
Apan alang ni Gilas coach Tim Cone, dili ang sayong pagbiya ni Brownlee maoy hinungdan sa ilang kapildihan, ngil-ad lang gyud silang nakaduwa isip usa ka puwersa hilabi na sa depensa ug napungot siya niini.
Pagsugod pa lang sa duwa, sunodsunod na nga turnovers ang namugna sa Gilas nga maoy hinungdan nga nakaposte ang Taiwanese og 27-16 nga labaw human sa 1st quarter.
“Obviously, we didn’t play a very good game. I’m disappointed with the way we played, and it looked like we were in panic mode,” matod ni Cone nga napatik sa www.abs-cbnnews.com.
“We were outcoached, and it was a disappointing one for my part,” he added.
Kanunay nga naggukod ang Gilas sa kombati ug adunay higayon nga ningburot sa 17 puntos ang labaw sa Taiwanese.
Adunay higayon nga napahak sa Gilas ngadto sa upat na lang ka mga puntos ang ilang pagkalubong apan nakamaneho ang Taiwanese pagbulhot og balik pinaagi sa ilang mga itsa sa gawas.
Si Kevin Quiambao nidugang og 17 puntos alang sa Gilas samtang ningtampo og 16 puntos matag usa sila si Dwight Ramos ug Scottie Thompson.
Nagkanayon si Cone nga kinahanglan dayon nilang ilubong sa limot kini nga kasinatian ug magtutok na sa sunod nilang mga duwa.
“There is only one thing that we can do at this point, and that is move on,” pasabot ni Cone.
Ang sunod duwa sa Gilas ipahigayon karong Huwebes, Agusto 7, alas 11:00 sa gabii batok sa New Zealand, nga ningbuntog sa Iraq sa laing kombati sa Group D.
Puntos matag usa:
Chinese Taipei (95) - Chen Y.C. 34, Gilbeck 16, R. Hinton 14, Lin 14, Gadiaga 5, A. Hinton 4, Tseng 4, Ma 3, Hu 1.
Gilas Pilipinas (87) - Brownlee 19, Quiambao 17, Thompson 16, Ramos 16, Edu 8, Oftana 6, Newsome 3, Fajardo 2, Perez 0, Aguilar 0, Tamayo 0. Quarters: 27-16; 43-34; 73-62; 95-87. / ESL