PHL Gilas miyukbo sa Poland

PHL Gilas miyukbo sa Poland
TUNE-UP. Nimugna og 30 puntos si naturalized player Justin Brownlee alang sa Gilas Pilipinas apan nausik ang tanan human sila gipatapsingan sa world No. 15 ug host Poland, 82-80, sa usa ka tune-up game alang sa umaabot nga Olympic Qualifying Tournament. / FIBA.COM

Natuldokan ang European tune-up games sa Gilas Pilipinas og laing kapildihan apan ning higayuna, mas nakasukol ang mga Pinoy una ningyukbo batok sa world No. 15 ug host Poland, 82-80, kagahapon sa kadlawon, Hunyo 30, 2024 (PH time).

Ang Gilas, nga nasuga­mak sa dakong kapildihan batok sa host Turkey, 84-73, sa premiro nilang tune-up game sa Europe, igo ra untang naggukod og duha ka mga puntos, 58-56, pagkahuman sa tulo ka quarters.

Apan pagsugod sa 4th quarter, nagbangis ang Poland ug nakamugna kini og 9-0 run aron inaton ang ilang labaw, 67-56.

Ang pambatong guard sa Gilas nga si Dwight Ramos maoy nimugna sa katapusang walo ka mga puntos sa duwa sa hinapos nga bahin aron ibalik pagsikit ang panagsangka.

Apan wala nahingpit sa Gilas ang ilang pagbangon gumikan kay nahikawan na sila sa oras.

Gipangulohan ni naturalized player Justin Brownlee ang Gilas pinaagi sa iyang 30 puntos, nidugang og 16 puntos si Ramos samtang nitunol og 10 puntos si June Mar Fajardo.

Si Michal Sokolowski, kinsa napiling Italian Cup MVP ning bag-uhay lang, maoy nangulo sa Poland pinaagi sa iyang 21 puntos.

Ang Gilas mobiyahe na paingon sa Riga, Latvia alang sa katapusang Olympic Quali­fying Tournament (OQT) diin usa lang ka luna sa Paris Olympics ang ilugan.

Sa OQT, sugdan sa Gilas ang ilang tahas pinaagi sa pagpakigbatok sa host Latvia karong Hulyo 4, 2024 (PH time).

Puntos matag usa:

Poland (82) – Sokolowski 21, Balcerowski 10, Pluta 8, Sochan 8, Ponitka 7, Zyskowski 6, Dziewa 5, Milicic 5, Michalak 5, Niziol 5, Mazurczak 2, Zolnierewicz 2.

Gilas Pilipinas (80) – Brownlee 30, Ramos 16, Fajardo 10, Sotto 8, Newsome 6, Aguilar 4, Tamayo 4, Perez 2, Oftana 0, Quiambao 0. Quarters: 16-23; 41-38; 58-56; 82-80. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph