Mihagpat ang Phoenix Fuel Masters ug Magnolia Chicken Timplados Hotshots og daog sa managlahi nga paagi sa Philippine Basketball Association (PBA) Philippine Cup niadtong Sabado.
Gilat-an sa Phoenix ang NLEX Road Warriors og 35 puntos, 112-77, didto sa Ynares Sports Arena, Pasig City, nga gibidahan sa 17 ka tres.
Ang 35 puntos nga labaw mao pud ang pinakadako nga win margin sa Phoenix franchise history matod pa sa PBA statistics chief Fidel Mangonon.
Gipangulohan ni RJ Jazul ang balance scoring attack sa Phoenix sa iyang 17 puntos sa 6-of-9 sa tres, samtang si Kenneth Tuffin midugang og 17 puntos, lakip na ang perpekto nga 3-of-3 sa tres.
Si Jjay Alejandro miamot og 16 puntos ug si Kent Salado mihatag og 11 puntos lakip na walo ka assists para sa Phoenix.
Misaka ang rekord sa Phoenix sa 3-5 (win-loss) samtang ang NLEX natagak sa 5-3.
Sa laing duwa, nakaipsot ang Hotshots batok sa Rain or Shine, 108-102, didto sa Tiaong Convention Center aron patas-an ang ilang winning streak ngadto sa upat ka sunodsunod nga duwa.
Nakahimo si Ian Sangalang ug Mark Barroca og timely shots alang sa Hotshots nga maoy mitapos sa win streak sa Elasto Painters.
Gilabni sa Hotshots ang ikalima nga daog sulod sa pito ka duwa ug nakuha ang ikaduha nga pwesto sa team standings.
Niining pagsuwat, gaduwa ang Meralco Bolts (3-4) batok Converge FiberXers (0-8), ug San Miguel Beermen (6-0) batok North Port Batang Pier (4-4). / RSC