GIPANGHIMAKAK sa Philippine Institute of Chemical Engineers (PIChE) Cebu Chapter niadtong Miyerkules, Hulyo 2, 2025, nga usa ka chemical engineer kadtong nadakpan nga operator sa usa ka illegal drug laboratory sa Cebu City nga si Stephen “Tepen” Tapulado.
Ang panghimakak giluwatan human malampusong nabungkag sa kapulisan ang usa ka laboratoryo sa shabu (methamphetamine) nga nag-operate sulod sa usa ka apartment sa D. Jakosalem Street niadtong Lunes, Hunyo 30.
Sa usa ka opisyal nga pamahayag, gidayeg sa PIChE Cebu ang Philippine National Police (PNP) Region 7 ug ang Philippine Drug Enforcement Agency (PDEA) sa ilang operasyon nga nisangpot sa pagbungkag sa illegal drug laboratory.
Gipadayag sa organisasyon ang ilang suporta sa padayong paningkamot sa pagpanalipod sa katawhan gikan sa peligro ug ilegal nga mga kalihukan.
Gipatin-aw sa PIChE Cebu nga human sa pagsusi sa Professional Regulation Commission (PRC) ug sa ubang academe institution, nakumpirmar nga si Tapulado dili usa ka lisensyadong chemical engineer o graduwado sa chemi-cal engineering program.
“His false representation and the media’s careless repetition of such claims unjustly malign the integrity of the chemical engineering profession,” giluwat nga pamahayag sa PIChE Cebu.
Gipahayag sa grupo ang ilang dakong kabalaka sa gihulagway nilang iresponsable nga pag-report nga naglambigit sa ilang propesyon sa ilegal nga kalihukan.
Ang report gikan sa Sunstar niadtong Martes, Hulyo 1, nagpakita nga gikumpirmar ni PRO 7 Chief Brig. Gen. Redrico Maranan nga ang target sa raid usa ka indibiduwal nga gituohang “chemical engineer” nga gi-surveillance sulod sa lima ka buwan tungod sa giingong paghimo og shabu ug party drugs sa lainlaing rehiyon sa Visayas ug Zamboanga City.
Ang PIChE Cebu hugot nga nanambag sa media outlets nga susihon una ang balita sa dili pa ipagawas.
Apan mga sakop sa media nibase lang sa pag-ila sa kapulisan sa suspek nga usa ka chemical engineer. / Antonette Caren Arrabis, CNU Intern