MAAYONG pagkagusbat sa dulong sa usa ka pickup nga sakyanan human kini nibangga sa konkreto nga poste sa kuryente gumikan kay matod pa nawagtangan og kontrol ang driver nga giingon usa ka sakop sa polis ug daw nakainom alas 2:30 sa kaadlawon, Hulyo 28, 2025, sa J. Alcantara Street, Barangay Sambag 1, Dakbayan sa Sugbo.
Gumikan sa kakusog sa impact, nabali ang poste apan wala kini molahos og katumba tungod kay napugngan sa mga cable wires nga nagkutay niini, samtang nakasinati og brownout ang pipila ka kabalayan sa dapit.
Sa inisyal nga imbestigasyon, nasayran nga ang maong sakyanan adunay tulo ka mga lalaki nga sakay nga matod pa mga polis nga gituohang nakainom.
Giingong kusog ang dagan sa sakyanan ug nibuto ang ligid niini hinungdan nga nawagtangan og kontrol ang drayber nga niresulta sa pagkabangga ngadto sa poste.
Hinuon, luwas ra ang mga sakay niini.
Human sa hitabo, gidala ang sakyanan sa Traffic Enforcement Unit sa Cebu City Police Office alang sa dugang imbestigasyon, samtang ang maong poste giatiman na sa taga Visayan Electric. / JDG