Gisugdan na ang pagpanindot aron mahimo usab nga environment friendly ang pantalan sa Santa Fe, isla sa Bantayan human sa groundbreaking ug capsule-laying ceremony pinangulohan ni Cebu Governor Gwendolyn Garcia.
Ang Kapitolyo nisaad nga mogahin og P277.6 milyunes alang sa unang duha ka mga phase sa proyekto.
Samtang dugang P22.3 milyunes usab ang gigahin niini alang sa demolition ug disposal sa konkreto nga unang problema niini nga nakababag sa agianan sa tubig sa pantalan hinungdan sa pagbanlas ug dili balanse nga pag-apod-apod sa balas sa mga baybayon sa isla.
Gipahibawo usab ni Garcia nga ang mga makolekta nga materyales gikan sa gi-demolish gamiton isip extension sa runway sa Bantayan Island Airport.
Ang himuong kausaban sa pantalan maglakip sa concrete deck nga may Roro ramp ug gangway facilities alang sa mga motorized banca nga magbiyahian sa isla.
Subay sa gipahibawo sa Kapitolyo, dunay upat ka phases ang himuong pantalan nga adunay gitas-on nga 350 meters.
Kahinumdoman nga mihatag na og pagtugot ang Cebu Port Authority (CPA) ngadto sa Probinsya sa Sugbo nga mo-construct ug mao nay mo-manage ug mo-operate unya sa mahuman nga bag-ong pantalan.
Gawas sa gobernador, lakip usab sa nitambong sa maong kalihukan mao sila si fourth district Congresswoman Janice Salimbangon, Santa Fe Mayor Ithamar Espinosa, Provincial Board Member Carmela Franco, ug Cebu Port Authority (CPA) General Manager Francisco Comendador III. / ANV