Tungod sa dakong utang kay gipusta sa online nga sugal nga scatter, nadakpan human manglabni og cellphone sa Gen. Maxilom Ave. eskina sa Imus Road, Barangay Lorega, dakbayan sa Sugbo sa alas 5:30 sa Miyerkules sa buntag Hunyo 26, 2024.
Ang suspetsado giila nga si alyas Andres, 27, taga Sitio Ponce 1, Barangay Carreta, dakbayan sa Sugbo.
Unang midangop sa Parian Police Station ang usa ka 25 anyos nga dalaga nga taga Espina Village 2, Barangay Guadalupe nga si alyas Genie nga nabiktima siya sa pagpanglabni sa Lorega diin nakuha ang iyang Iphone ProMax.
Nisuway pa unta paggukod ang biktima apan kusog kinii nga midagan paingon sa Barangay Carreta.
Sa gihimong follow up operation, nadakpan ang suspek alas 11:00 sa gabii, Miyerkules, Hunyo 26, 2024.
Matod ni Police Major Marvin Fegarido, ang hepe sa Parian Police Station nga nakig-alayon sila sa Carreta ug gipangsubay ang mga CCTV camera diin dinhi ilang nailhan ang suspetsado.
Giangkon sa suspetsado ang krimen tungod, matod pa, sa utang niini gumikan kay gipusta sa sugal nga scatter.
Wa na siya makahinumdom kon pila na ang iyang napildi sa maong matang sa sugal gani tungod sa ka ungo na niya sa scatter daghan na siyag butang nga naprenda.
Gibutyag niya nga nakadaog na siya og P40,000 nga maoy hinungdan nga naadik siya sa sugal apan nanglabi gihapon human napildi hinungdan tulo ka cellular phone ang iyang nabaligya aron ipusta sa scatter.
“Tulo na ka cellphone ang nawala nako. Sa akong pares nawala ug akoa, prenda daog tungod kay pa cash in..” matod ni Andres.
Dinagko usab ang iyang ipusta niini.
Ang iyang nalabni nga iPhone ProMax nga mobalor sa P80,000 iya lang kini nga giprenda sa P16,000.
Matod pa, kini iyang gipalit og tulo ka cellphone samtang ang uban iyang gibayad sa iyang mga utang.
Wala siya magtuo nga mailhan siya sa mga polis ug madakpan sa gilusad nga follow-up operation.
Nangayo siya’g pasaylo sa iyang gibiktima nga unta dili lang siya pasakaan og kaso dungan sa saad nga dili na niya kini usbon sa paghimo.
Apan gibutyag ni Fegarido nga desidido gyud nga mokiha ang biktima sa suspetsado gani giandam na nila ang kasong pagpangawat ngadto sa piskalya. / AYB