Mas gipasayon na sa kagamhanan sa lungsod sa Pinamungajan ang insurance application alang sa mga mag-uuma sa matag barangay.
Ning Pebrero, gilusad sa Pinamungajan Municipal Agriculture Office (MAO) ang Baranggayan 2024, diin ilang dad-on sa matag barangay sa lungsod ang mga serbisyo sama sa libreng livestock ug crop insurance application.
Ingon man ang pag parehistro alang sa Registry System for Basic Sectors in Agriculture (RSBSA) nga mao’y basehan kinsa nga mga mag-uuma ug mananagat ang qualified sa nagkadaiyang mga programa ug serbisyong agrikultural sa gobyerno.
Gawas sa mga mag-uuma ug mananagat, aduna usa’y gibukas nga application alang sa pagparehistro sa National Coconut Farmers Registry System (NCFRS) alang sa mga mangoprasay o mga nananom og lubi.
May libreng konsultasyon usab nga gitagana alang sa mga dunay pangutana o concerns kabahin sa agrikultura.
Gipahibaw sa kagamhanan nga pinaagi sa Baranggayan, di na kinahanglang maghago pa og biyahe ang mga mag-uuma ug nagbuhi og hayupan aron maka-avail sa mga programa ug serbisyo sa gobyerno.