Pinay boxer nakaseguro na’g medalya
Nakaseguro na og medalya si Filipina boxer Aira Villegas sa labing una pa lang niyang kampanya sa Olympics human niya gilupig pinaagi sa split decision si Wassila Lkhadiri sa host France sa quarter-finals sa women’s 50kg division sa sayo sa buntag sa Dominggo, Agusto 4, 2024 (PH time) sa Paris.
Ang tulo ka judges nipabor ni Villegas, 29-28, 29-28, 29-28, samtang ang laing duha nidapig ni Lkhadiri, 30-27, 29-28.
Si Villegas, 29, nakapasulod og kumbinasyon sa mga kumo nga igo na aron maangkon niya ang bintaha sa 1st round.
Apan nibawi si Lkhadiri sa 2nd round diin napasudlan niya og tuo nga kumo si Villegas sulod sa ubay-ubay nga higayon.
Sa 3rd round, nagbinukbokay na ang og maayo ang duha ka mga boksidor apan tataw nga nakabintaha si Villegas.
Sa laing bahin, nanamilit ang laing boksidor sa Pilipinas nga si Carlo Paalam human siya gipilde ni Australian Charlie Senior pinaagi sa split decision sa quarter-finals sa men’s 57kg division niadtong Sabado sa gabii, Agusto 3. / ESL