Usa ka Filipina nga caregiver sa Israel ang anaa sa kritikal nga kondisyon human naigo sa missile ang iyang pinuy-anan.
Gibutyag sa Philippine Embassy sa Israel nga ang biktima nakadawat og labing maayo nga ICU treatment sa Shamir Medical Center human mag-antos og kadaot sa kasingkasing ug baga.
“We are doing everything within our means to reach and assist our nationals affected by this crisis. Our thoughts and prayers are with them and their families, especially our kababayan who is now fighting for her life. We ask the Filipino community to join us in praying for her survival and healing,” matod ni Philippine Ambassador to Israel Aileen Mendiola sa iyang pamahayag.
Giingon sab ni Mendiola nga laing walo ka mga Pilipino ang naangol sa retaliatory airstrikes sa Iran.
Duha niini nga mga biktima, usa ka 43-anyos nga babaye nga gioperahan sa emergency ug usa ka 44-anyos nga lalaki nga adunay mga kadaot sa bukton ug bitiis, gitambalan sa Kaplan Medical Center sa Rehovot.
“The Embassy is coordinating with hospital social workers and the Rehovot local government to ensure that, upon discharge, the victims will be transferred to appropriate shelters, granted their due compensation and benefits, and properly assisted in their recovery,” matod ni Mendiola.
Sa Hunyo 16, nipahibalo ang Department of Migrant Workers (DMW) nga 18 ka overseas Filipino workers (OFWs) nga na-stranded sa Dubai sulod sa 48 oras tungod sa panagbangi ang nakauli na sa Pilipinas ug nakadawat og P50,000 nga tabang matag usa. Matod sa DMW nga adunay gibana-bana nga 30,000 ka mga Pilipino sa Israel.
Ang departamento nagpabilin nga andam alang sa bisan unsang mga panghitabo, lakip ang dinaghang pagpauli kon kinahanglan. / TPM / SunStar Philippines