Ang Sugbo maoy napili sa 36-anyos nga si Kach Medina Umandap sa iyang pagpauli dinhi sa nasod human sa kapin sa usa ka dekada nga pagbiyahe sa 195 ka nasod sa pito ka mga kontinente.
Usa ka makasaysayunon nga kalampusan ni Umandap nga giila nga labing batan-on nga Pinay nga naghupot og Philippine passport, kinsa nakataak sa 193 ka United Nations nga mga nasod ug duha ka observer states.
Sakay ang Emirates gikan sa nasod sa Dubai, niabot sa Sugbo si Umandap niadtong Lunes, Enero 13, 2025.
Matod pa sa batan-on nga Economic graduate sa University of the Philippines - Los Baños, nga mao kini ang labing unang higayon nga nakaduaw sa Cebu sakay sa international flight.
Sa iyang pagtuo nga wala’y direkta nga flights gikan sa nagkadaiyang mga nasod gikan ug paingon sa Cebu.
Nasayran nga niadtong tuig 2009 dihang unang nanarbaho si Umandap sa nasod sa Kuwait ug Iraq, usa sa pangandoy niini mao ang makaangkon og Diplomatic passport aron matuman ang iyang damgo sab nga makabiyahe sa nagkadaiyang nasod.
Apan mibiya ang lumad sa San Pablo City, Laguna, sa iyang trabaho niadtong 2013 ug nagsugod og backpacking sa South East Asia ug South America.
Matod ni Umandap nga isip Filipino, usa sa mga gipangbisita niya mao ang mga nasod nga libre ang visa alang sa Pinoy.
Tungod sa trabaho niini isip usa ka digital nomad, wala nahimong problema alang kaniya ang pagbiyahe ingon man ang pagpangita og ikasuporta sa iyang mga laag.
Lakip sa nahimo niining trabaho mao ang pagtudlo og English, Massage Therapist, Yoga instructor, ug travel blogger.
Sa iyang pagtuyok sa nagkadaiyang mga nasod, nipuyo na sab kini sa pipila ka mga nasod sama sa Middle East, Vietnam, Peru, Costa Rica, Colombia, Florida, Dominican Republic, ug Montenegro.
Gani usa sa gihimo niini mao ang pagpuyo sa usa ka sailboat sulod sa duha ka tuig kuyog ang iyahang mga binuhing iring.
Si Umandap mao ang nagpaluyo sa mga websites sama sa TwoMonkeysTravelGroup.com, FilipinoPassport.com, ug TravelwithKach.com.
Bag-o lang sab napupos ang kontrata niya sa The Filipino Channel alang sa iyang TV show.
Nahimong ika-195 nga nasod ni Umandap mao ang nasod sa Sudan sa North Africa. Bisan pa man sa civil war sa maong nasod apan natuman ang iyang travel sa N. Africa pinaagi sa nagkadaiya niini nga diskarte.
Gawas sa pag-apply sa naandan nga proseso sa visa, usa sa gibuhat ni Umandap mao ang pakig-partner sa nagkadaiyang tourism board alang sa mga nasod nga wala’y Philippine embassy.
Dinhi gipaningkamutan niya nga makagamit sa iyang plataporma nga ma-promote ang ilang nasod ngadto sa internet.
Dihang gipangutana sa mga sakop sa Cebu media kon unsa nga nasod ang alang niya susama og Pilipinas, gitubag niini mao ang nasod sa Montenegro diin adunay siya’y kaugalingong balay.
Tungod sa nakab-ot karon ni Umandap, nahimo siyang kabahin sa elite group nga UN Masters, o kining mga traveler nga nakatungtong sa tanang UN-recognized countries.
“I want Filipinos to know that traveling the world is possible, even with a low-index passport. Whether through a Digital Nomad lifestyle or careful planning alongside a traditional job, it’s an achievable dream,” matod niya nga nag-promote karon sa Remote Filipino Workers imbes nga Overseas Filipino Workers, aron mahatagan og kahigayunan ang mga Pinoy nga makabiyahe bisan nga nagtrabaho. Karon, mopahuway usa si Umandap sa pagtuyok sa mga nasod ug nagtabang siya sa ubang Pinoy nga gusto makakuha og visa. Anaa usab kini kompanya sa Dubai.
“Visualize your dreams, set them as goals, and take the steps to make them happen. To my fellow Filipinos and travelers—you can create the life you want while achieving your goals,” tambag niini sa mga aspiring Pinoy nga gusto nga molaag sa ilang dream destination. /