Gipasalamatan ni Filipina weightlifter Vanessa Sarno ang iyang kritiko human siya naka-qualify alang sa 2024 Paris Olympics niadtong Dominggo, Abril 7, 2024, atol sa maayo niyang kampanya sa IWF World Cup sa Phuket, Thailand.
Sa World Cup, si Sarno nakaalsa og kinatibuk-ang 245 kilograms gikan sa 110 kgs. sa snatch ug 135 kgs. sa clean and jerk nga nagpahiluna kaniya sa ikalimang puwesto sa women’s 71kg division.
Igo na kini aron makakuha siya og tiket sa Paris Game.
Ang 110 kgs. sa snatch ni Sarno maoy bag-ong rekord sa Pilipinas.
Gipasabot ni Sarno nga nahagit siya og maayo dihang adunay nag-ingon kaniya nga wala siya’y purohan nga maka-qualify sa Olympics.
“To someone na nagsabi sa akin na hindi ko kayang mag-Olympics, thank you,” post ni Sarno sa iyang social media account nga napatik sa Spin.ph.
Sa wala pa siya nikampanya sa World Cup, si Sarno, 20, nidaug sa Asian Championship niadtong 2020, nakasakmit og duha ka gold medals sa Southeast Asian Games ug tulo ka Asian juniors gold medals. / ESL