KAPIN sa P2.5 milyunes ang gibanabana nga danyos sa nahitabong sunog sa Sitio Mananga 2, Barangay Tabunok, Dakbayan sa Talisay nga nakaapekto sa 229 ka mga pamilya niadtong Miyerkules, Hunyo 25, 2025.
Giisa ngadto sa Task Force Alpha sa alas 2:50 sa hapon ang alarma tungod sa kalapad na sa sunog nga nikaon sa mga balay nga sagad ginama sa light materials.
Ang maong sitio gilangkuban sa upat ka mga purok diin ang tulo niini maoy grabeng naapektuhan nga mao ang Purok Jacinto Zamora nga gikataho nga didto nagsugod ang kayo, Purok Jose Rizal, ug Purok Julian Felipe.
Sumala sa pamahayag ni F02 Mar Dee II A. Auxtero nga nadawat nila ang alarma sa alas 2:11 sa hapon nga giisa sa first alarm sa alas 2:17pm.
Paglabay sa 10 minutos, giisa na sab kini sa 3rd alarm tungod sa kapaspas sa pagkatap sa kayo ug sa mga alas 2:43 sa hapon gideklarar nga anaa na sa fourth alarm.
Nibutyag si Auxtero nga gumikan sa kakuwang sa agianan ug interior ang maong nasunogan naglisod ang kabomberuhan sa pagrumbo sa mga kabalayan nga gilamoy sa kayo.
WELDING
Base sa nahipos nga imbestigasyon nga ang napangutana nga saksi nibutyag nga nagsugod ang sunog sa dapit diin adunay nag-welding.
Giingong ang puthaw nga tubo alang sa patubig sa usa ka pribado nga water company maoy gitrabaho niadtong higayona.
Giingong nagbaga nga pinisik gikan sa gi-welding nga nangatagak didto sa basura ang gidudahan maoy hinungdan sa sunog.
Gipalawman sa kabomberuhan sa Talisay ang imbestigasyon ug ang pagsuta sa gidaghanon sa mga balay nga naugdaw.
Sa pagkakaron, gipahimu-tang ang mga biktima sa Tabunok Sports Complex diin nahatagan na sab og pasiunang tabang gikan sa lokal nga kagamhanan. /JDG