Moaway pagbalik sa Japan ang kanhi world title contender nga si Filipino Dave Apolinario ug iyang kontrahon si Chinese Longyi Hu karong Martes, Abril 22, 2025, sa Korakuen Hall sa Tokyo.
Kini maoy ikaduhang away ni Apolinario human siya napakyas sa iyang world title fight sa niaging tuig diin nasugamak siya sa 6th round knockout nga pilde batok ni Mexican Angel Ayala sa inilugay sa bakanteng International Boxing Federation (IBF) flyweight title.
Human sa iyang pagkapilde batok ni Ayala, nibawi si Apolinario pinaagi sa unanimous decision nga daog batok ni Jenny Boy Boca.
Si Apolinario, kinsa kanhi highly-rated, kasamtangang No. 17 contender sa World Boxing Council (WBC).
Sa iyang bahin, dili na bag-o alang ni Hu ang pagpakig-away og Pinoy nga boksidor.
Niadtong 2023, nakig-away siya ni Angilou Dalogdog diin napilde siya pinaagi sa split decision sa inilugay sa World Boxing Foundation (WBF) Asia-Pacific flyweight title sa Bohol.
Ang laing Pinoy nga nakontra ni Hu mao si Dennis Endar diin niresulta sa majority draw ang ilang away nga gipahigayon sa Vietnam.
Si Apolinario adunay 21-1, 14KOs nga rekord samtang si Hu adunay 8-2-2, 4KOs nga baraha. / EKA, ESL