Makigsinumbagay si Filipino prospect Junibert Bantay ni Japanese Haruki Miyamoto sa inilugay sa World Boxing Foundation (WBF) Asia Youth super-featherweight strap sa main event of Chao Sy Boxing Promotions’ “Fist of Fury VIII: Philippines vs. Japan” karong Agusto 16, 2025, sa SM Seaside City sa Dakbayan sa Sugbo.
Nagkanayon si Chao Sy Boxing Promotions head honcho Lorenzo “Chao” Sy nga nindot kining awaya gumikan kay parehong wala’y pilde ang duha ka mga boksidor ug sama ni Bantay, sumosulbong sab nga boksidor sa Japan si Miyamoto.
Mao kini ang labing unang title fight sa 25 anyos nga si Bantay ug ikaduha kining higayon nga makigkontra siya og langyaw nga boksidor.
Sa labing una niyang pagpakig-away og langyaw, nidaog si Bantay batok ni Chinese Tangjaerke Asihaer pinaagi sa unanimous decision niadtong Abril 12, 2025, sa Mandaue City.
Si Bantay naggunit og 8-0, 1KO nga rekord samtang si Miyamoto adunay 2-0, 2KOs nga baraha. /EKA, ESL