Di lang si legendary boxer Manny Pacquiao ang atngan karong Hulyo 19 sa MGM Grand sa Las Vegas, kay mopakita pud sa ilang abilidad ang Pinoy boxing stars sa undercard fights.
Gi-anunsyo sa Viva Promotions nga apil sa undercard sa Pacquiao vs. Mario Barrios World Boxing Council welterweight title fight ang duha ka kanhi world champions ug usa ka Olympic bronze medalist.
Sila mao si Jerwin Ancajas, kanhi super-flyweight champion, si Mark “Magnifico” Magsayo, kanhi featherweight titleholder, ug si Eumir Marcial, nga nakakuha og bronze medal sa Tokyo Olympics.
Apil sab sa lineup ang ubang Pinoy warriors nga sila Jonas Sultan ug Jhack Tepora. Nag-uban-uban kini sila ni Pacquiao sa iyang buntag nga dagan ug workout sa Fortune Boxing Gym sa California.
Si Ancajas, nga nidominar sa IBF super-flyweight division gikan 2016 hangtod 2022, nawad-an sa iyang titulo kontra ni Fernando Martinez sa Argentina. Human sa kapildihan, nisaka na siya og timbang ug karon nag-away na sa junior featherweight division. / RSC