MAKIGBINUKBOKAY si Filipino Dave Peñalosa batok ni Chinese Jiang Weiyi alang sa inilugay sa World Boxing Foundation (WBF) Silver lightweight title sa main event sa “Fist of Fury VII: Philippines vs. China” sa Chao Sy Boxing Promotions karong Sabado sa gabii, Hunyo 28, 2025, sa Barangay Tinago Gym sa Dakbayan sa Sugbo.
Si Peñalosa, 34, kinsa anak ni kanhi two-division world champion Dodie Boy Peñalosa, makonsiderar nga inilog ning awaya gumikan kay dako kaayo siya’g bintaha sa kasinatian.
Si Peñalosa naggunit og 19-1, 12KOs nga rekord samtang si Jiang aduna lang 2-1, 1KO nga baraha.
Lupig man tuod kaayo sa kasinatian si Jiang apan wala kini nagpasabot nga wala na siya’y dag-anan. Masaligon ang kampo ni Jiang nga modaog ning awaya.
Ang promoter nga si sportsman Lorenzo “Chao” Sy nagkanayon nga pulos nindot ang mga away ning maong promosyon.
Sa co-main event, makigbatok si FilipinoVicente Unidos (4-0, 3 KOs) ni Chinese Touhatasen Sailibieke (5-0, 3 KOs).
Sa undercard, magsangka sila si Jefre Jimenez (4-0, 2 KOs) batok Marlon Alejandro (6-7-2, 1 KO) alang sa Philippine Boxing Federation (PBF) light-flyweight belt ug Jemuel Aranas (6-2, 3 KOs) batok Anthony Gilbuela (8-7-3, 2 KOs).
Adunay amateur fights nga ipahigayon sa dili pa sugdan ang binukbokay sa professional ranks. / ESL