Nadakpan ang giilang high value target sa Philippine National Police (PNP) ug Philippine Drug Enforcement Agency (PDEA) human nakuhaan og gibana-banang P408,000 nga balor sa gidudahang shabu sa gilusad nga buy-bust sa Purok 3, Sityo Candair, Barangay Dampas, Tagbilaran, Bohol niadtong Miyerkules sa gabii, Agusto 5, 2026.
Giila ni PDEA 7 Regional Director Joel Plaza ang suspek nga si alyas Elmer, 52, usa ka pintor ug lumulupyo sa Barangay Camayaan, Lungsod sa Loboc, Bohol.
Ang operasyon gipahigayon sa mga sakop sa PDEA Bohol Provincial Office uban sa pakigtambayayong sa Tagbilaran City Police Station ug Bohol Maritime Police, diin gihimo ang pagsikop sa suspek alas 7 sa gabii.
Nakuha gikan sa suspek ang upat ka sachet sa gidudahang shabu nga nitimbang og 60 gramos ug adunay estimated average market value nga P408,000.
Gawas sa nakuhang drugas, nasakmit sab sa mga operatiba ang buy-bust money, cellphone, ug ang motorsiklo nga gigamit sa suspek sa pag-deliver sa shabu.
Nasayran sab nga makabaligya ang suspek og hangtod sa 100 gramos nga shabu matag semana gikan sa iyang suplayer.
Ang mga nakuhang ebidensya gidala na sa PNP Bohol Forensic Unit alang sa dugang pagsusi, samtang ang suspek kasamtangang gibalhog sa Tagbilaran City Police Station custodial facility.
Giandam na sa PDEA ang pagpasaka og pormal nga kasong paglapas sa Section 5 ug 11, Article II sa Republic Act 9165 kon Comprehensive Dangerous Drugs Act of 2002 batok sa suspek. / AYB
