Usa ka pintor sa construction ang nadakpan sa gilusad nga buy-bust sa Philippine Drug Enforcement Agency (PDEA) 7 uban sa Philippine National PoliceRegional Intelligence Unit (RIU) 7, alas 9:30 sa gabii, Sabado, Nobiyembre 30, 2024, sa Sitio Upper Banica, Barangay Lahug sa siyudad sa Sugbo.
Ang suspek giila nga si Edgar Duhilag, 49, nagpuyo usab sa naasoy nga dapit, nakuhaan og usa ka dakong pakete sa gituohang shabu nga motimbang sa 50 gramos nga dunay estimated average market value nga P340,000 ug ang buy-bust money.
Matod ni Leia Alcantara, information officer sa PDEA 7, usa ka buwan nga ilang gipaubos sa case buildup ang suspek human nila madawat ang impormasyon gikan sa usa ka kasaligang tinubdan.
Giingong makabaligya si Duhilag og 200 gramos nga shabu matag semana gikan sa iyang supplier.
Padayon pa karon ang gihimong imbestigasyon sa PDEA 7 sa suspetsado ug gitakdang pasakaan kini'g kaso sa kalapasan sa Section 5, Article II, Republic Act 9165 o Comprehensive Dangerous Drugs Act of 2002 ngadto sa korte. / AYB