Pipila ka lugar sa Mandaue, Lapu-Lapu gibahaan

Ang grabeng uwan niadtong Sabado, Hulyo 5, 2025, maoy hinungdan sa pagbaha sa pipila ka bahin sa Mandaue ug Lapu-Lapu City, diin abot tuhod ang giladmon sa tubig.

Ang Philippine Atmospheric, Geophysical and Astronomical Services Administration (Pagasa) opisyal nga mideklara sa pagsugod sa ting-uwan niadtong Hunyo 2.

Matod sa weather bureau, kini nagpasabot sa transisyon gikan sa ting-init ngadto sa ting-uwan sa nasod.

Si retired Fire Superintendent Noel Nelson Ababon, pangulo sa operations ug warning division, niingon sa usa ka mensahe sa SunStar Cebu niadtong Dominggo, Hulyo 6, nga ang Barangay Tipolo sa Mandaue City nakasinati og abot tuhod nga baha.

Sa Lapu-Lapu City, si Andy Berame, emergency operations manager sa City Disaster Risk Reduction and Management Council, niingon sa usa ka interview sa telepono nga pipila ka lugar sa Barangay Basak gibahaan tungod sa mga basura nga nibara sa drainage, partikular sa Sitio Tangke ug sa usa ka interior road duol sa Basak Elementary School.

Matud niya nga ang maong lugar adunay nagpadayon nga drainage project nga wala pa makonektar sa main outfall, nga maoy.

Sa samang rason, usa usab ka residential area sa Basak nga nahimutang atbang sa usa ka industrial zone, ingon man usa ka lahi nga seksyon duol sa gasolinahan, nakasinati usab og pagbaha atol sa kusog nga uwan.

“Kini dugay nang problema kay ang maong lugar latian, diin naggikan ang ngalan nga Basak,” matud ni Berame.

“Nagkagrabe lang ang sitwasyon tungod kay ang mga tawo walay paki nga maglabay og basura, ug bisan pa nga dili pa hingpit nga konektado ang drainage system, ang mga basura nakapabara na.”

Matod niya nga sa higayon nga mahuman ug hingpit nga magamit ang drainage system, masulbad na ang isyu sa pagbaha sa maong mga lugar. / DPC