GISALIKWAY sa Pagkakaisa ng mga Samahan ng Tsuper ug Opereytor (Piston) Cebu Chapter ang plano sa Land Transportation Franchising ug Regulatory Board (LTFRB) nga aprubahan ang petisyon sa P1 nga usbaw sa plete nga gihulagway nga dili igo ug dugay nang gipaabot.
Gikonsiderar sa LTFRB ang pag-apruba sa P1 nga usbaw sa plete sa sunod semana, tungod sa nagpadayon nga panagbangi tali sa Iran ug Israel nga mahimong makaapekto sa kalibutanong merkado sa mga produkto sa petrolyo.
Sa laing bahin, gipasalig sa administrasyon ni Presidente Ferdinand Marcos Jr. nga ang nasudnong gobiyerno mohatag og subsidy sa gasolina alang sa sektor sa pampublikong transportasyon nga apektado sa pagtaas nga presyo sa petrolyo.
Apan ang mga drayber sa tradisyonal nga jeepney dinhi sa Cebu nisaway sa giplanong piso nga usbaw kay dili igo.
Si Greg Perez, presidente sa Piston Cebu Chapter, nitug-an sa SunStar Cebu pinaagi sa text message niadtong Hunyo 18, 2025, nga ang petisyon alang sa usbaw sa plete dugay na nga gisang-at apan kaniadto gibalewala.
Gibutyag ni Perez nga ang usbaw sa plete niining panahona wala na kinahanglana ug adto ra ni paingon sa ilang mga buhis.
“Kon atong basihan sa padayon nga pagsaka sa presyo sa gasolina, kana (ang usbaw sa plete) dili gyud igo,” matod niya.
Dugang niya nga bisan og gikuwangan sila sa usbaw, dili na sila makapetisyon og dugang tungod kay makaapekto sab kini sa mga pasahero, ilabi na sa mga estudyante kansang mga ginikanan way igong kita. / Divine Grace Bendanillo, CNU Intern