Ang transport groups nga Piston ug Manibela nitakda og nationwide transport strike sunod semana taliwala sa nag-ung-ong nga deadline sa pagkonsolida sa public utility jeepneys (PUV) ubos sa PUV Modernization Program (PUVMP) sa gobyerno.
Apan ang chapter sa Piston dinhi sa Sugbo nga gikuhaan og pamahayag nipahibawo nga di sila moapil.
Ang presidente sa Manibela nga si Mar Valbuena niingon nga ang duha ka adlaw nga transport strike magsugod sa Lunes, Abril 15, 2024.
Ang presidente sa Piston national nga si Mody Floranda nagpabilin sa ilang pagsupak batok sa PUV consolidation policy, nga gikinahanglan sa mga drayber/operator nga magkonsolida ngadto sa usa ka kooperatiba aron maseguro ang pag-renew sa ilang mga prangkisa sa provisional authority.
Ang PUV consolidation modala ngadto sa pag-ilis sa tradisyunal nga mga jeepney ngadto sa modernong mga yunit nga adunay labing menos dunay Euro 4-compliant nga makina o usa ka electric nga makina aron maminusan ang polusyon.
Niadtong Miyerkules, Abril 10, 2024, si Presidente Ferdinand Marcos Jr. niingon nga ang Abril 30 nga deadline alang sa konsolidasyon sa mga PUVs katapusan na.
Si Marcos nipasalig nga ang mga drayber ug operator di mabug-atan sa PUVMP kay dunay subsidy sa gobyerno alang sa modernong PUV’s.
Ubos sa programa, ang mga drayber/operator makadawat og subsidy sa gobyerno, nga gikan sa P200,000 ngadto sa P300,000 matag sakyanan, aron matabangan sila nga makasagubang sa pinansyal.
Tabangan usab sila alang sa mga transaksyon sa bank financing.
Ang Piston ug Manibela nagpahigayon usab og transport strike niadtong Enero tungod sa samang kabalaka.
Niadtong Marso 2024, ang Land Transportation Franchising and Regulatory Board niingon nga 80 porsiyento sa mga PUV sa nasod nakatuman na sa polisiya sa konsolidasyon. / TPM /SunStar Philippines