Plano na unta nila nga magminyo hinungdan nga magpabalhin siya pagdestino sa Bohol. Apan di na kini madayon human ang iyang boyfriend sulod sa unom ka tuig namatay sa engkwentro tali sa mga rebeldeng New People’s Army niadtong Pebrero 23, 2024 sa Bilar, Bohol.
Si Police Corporal Gilbert Amper namatay human sila giingong pabuthi sa mga NPA nga gipangulohan ni Domingo Jaspe Compoc sa Sitio Matin-ao 2, Barangay Campagao, Bilar dihang ila untang i-serve ang warrant of arrest.
Matod ni Jail Officer Harley Sucuano nga iyang katuyoang magpabalhin sa Bohol alang sa ilang plano.
“Nag plan pa lang unta, nagpaabot ra siya mabalhin ko sa Bohol kay currently naa man pud ko sa Cebu na-assign,” chat ni Sucuano sa Superbalita Cebu niadtong Pebrero 23, pipila ka mga oras human napatay sa engkwentro ang iyang hinigugma nga polis.
Di lalim ang iyang gibati tungod kay usa ka adlaw sa wa pa ang hitabo, namatay usab ang iyang amahan.
“Wala jud ko kahibaw asa ko magsugod. Nagmahay ko nga wa ko kasabot,” matod sa iyang post.
Dugang niya nga naka-message pa si Amper kaniya sa dihang niabot na sila sa Campagao, apan wa na siya nidisturbo pa niini kay nasayod siya nga naa kini sa usa ka mission.
Gawas pa, nagbangutan siya sa kamatayon sa iyang amahan niadtong higayuna. / REV