Matag Marso, ang kapulisan sa tibuok nasod mohigpit sa pagbantay sa seguridad sa mga tourist destination nunot sa pagsugod sa pagdagsang sa mga langyaw ug mga lokal nga bisita nga mobakasyon hinungdan sa ilang pagpatuman og balik sa Oplan SumVac (summer vacation).
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office (PRO 7), nga ang ilang gihimo sa pagkakaron mao ang pagkuha’g data sa mga tourist destination aron ilang masayran kon pila ka mga personnel ang gikinahanglan nga ipakatap sa dapit.
Bisan kon sayo pa karon, apan ilang gisubay kon duna bay mga lugar sa rehiyon 7 nga kinahanglan nga ipaubos sa area of concern.
Dunay igong gidaghanon ang mga personnel sa Tourist Police Unit sa tibuok Central Visayas nga mao karon ang nagbantay sa inila nga mga suroyanan.
Dugang ni Pelare nga gipahugtan sa kapulisan sa Central Visayas ang ilang intelligence gathering ug monitoring tungod sa posibilidad nga modagsa ang mga langyaw nga bisita gikan sa lainlaing nasod.
Apan iyang gipaniguro nga wala silay nadawat nga seryusong hulga sa siguridad nga makapahadlok, diin iyang gihulagway nga labing hapsay ug luwas ang katawhan sa rehiyon 7.
Ang Sugbo usa sa mga bisitahon sa daghang mga turista ilabi na sa probinsya sama sa mga lungsod sa Moalboal, Badian ug isla sa Bantayan nga gisundan sa lalawigan sa Bohol, Negros Oriental ug Siquijor.
Kini nga mga lugar ang gipatutokan ni Aberin nga hatagan og hugot nga seguridad sa kapulisan.