Nakarekord ang Philippine National Police (PNP) og ubay-ubay pa nga bayolenteng mga insidente atol sa eleksyon ning Lunes, Mayo 12, 2025.
Pipila ka mga oras sa wala pa ang pag-abli sa voting centers sa alang sa sayong pagboto sa vulnerable individuals, nakarekord ang Police Regional Office–Davao Region og armadong engkuwentro tali sa supporters sa mayoralty candidates sa Barangay Mesaoy, New Corella, Davao del Norte, nga ningresulta sa pagkasikop sa duha ka mga tawo.
Duha ang samaran sa maong insidente.
Sa wala pa nagsugod ang regular nga pagboto sa publiko, alas 7:00 sa buntag, nahitabo ang usa ka pagpamusil sa barangay Mambulac, Silay City, Negros Occidental, nga niresulta sa pagkamatay sa duha ka mga tawo ug pagkaangol sa laing lima ka mga tawo.
Gipangalanan sa PNP ang tulo ka mga suspek nga naglakip ni Barangay Lantad Chairman Arnie Benedicto.
Kasamtangang nagpadayon ang hot pursuit sa kapulisan ug wala pa nasayran kon unsa’y motibo sa mga suspek.
Usa pa ka insidente sa pagpamusil ang nahitabo sa Barangay Rinabor, Bayang, Lanao del Sur, nga niresulta sa pagkamatay sa usa ka kandidato isip konsehal sa lungsod, nga igsuon sa barangay chairman sa Sumbag Bayong.
Sa Dinas, Zamboanga del Sur, usa ang samaran human sa mainiton nga panaglalis tali sa supporters sa mga politiko sa maong lugar.
Sa Datu Odin Sinsuat, Maguindanao del Norte, nga daan nang gibutang ubos sa Comelec control, kapin sa 100 ka polling centers ang wala pa naka-abli alang sa pagsugod sa pagboto ning pagsuwat.
Sa usa ka press conference, si Bangsamoro police Public Information Office (PIO) chief Lieutenant Colonel Jovy Ventura niingon 312 ka police personnel sa kinatibuk-an ang magdumala sa pagboto sa 104 ka polling centers sa sulod sa maong lungsod.
Gipasabot ni Ventura nga nahitabo kini tungod sa protesta nga gihimo sa mga miyembro sa UBJ partylist sa ganghaan sa municipal hall, nga nakababag sa paspas nga pagdala sa automated voting machines ug ubang election materials.
Gikompirmar usab sa PNP ang insidente sa Marawi City diin usa ka poll watcher ang nagsabwag og tubig sa vote-counting machine.
Ang babaye nga suspek nakalikay sa pagdakop ug karon gipangita na sa mga awtoridad.
Sa usa ka interbyu, si PNP chief General Rommel Marbil niingon nga bisan pa sa maong mga insidente, ilabi na sa Bangsamoro region, ang kahimtang sa nasod sa panahon sa eleksyon nagpabiling malinawon.
Sa laing bahin, gikataho sa PNA nga usa ka municipal council candidate ug iyang kauban ang gipusil patay dihang paingon silang moboto sa Bayang, Lanao del Sur.
Ang mga biktima giila sa kapulisan nga sila si Afganie Balt Taha, kinsa nilansar sa maong lungsod, ug iyang supporter nga si Walid Balt Taha.
Nahitabo ang insidente sa alas 8:00 sa buntag sa Barangay Rinabor.
"They were heading to Mauyag Papandayan National High School polling precinct when attacked," matod ni Bayang police chief Capt. Edmundo Nabor.
Wala’y suspek nga nailhan ug wala say motibo nga nasayran ning maong insidente. / TPM / SunStar Philippines / PNA