GIDASIG sa kapulisan sa Central Visayas ang publiko nga mo-dial lang sa 911 kon dunay dinalian nga pagpangayo og tabang sama sa krimen, aksidente, sunog, ug medical nga emergency nga kinahanglan sa dali nga pagtagad.
Ang 911 nga hotline mao ang official nga national emergency number nga unang gilusad sa administrasyon ni President Ferdinand Marcos Jr. aron pagsiguro nga ang pagpangayo og tabang pinaagi na lang sa pag-dial sa ilang telepono.
Si Police Brigadier General Redrico Maranan ang hepe sa Police Regional Office 7 subling nipahibalo sa publiko nga gamiton ang ilang cellular phone pinaagi sa pag-dial sa 911 hotline kon motawag sa mga polis.
Iyang gipasalig nga ang polis dali nga motubag kon unsa man nga matang sa problema ang ilang sagubangon.
“Kon adunay krimen, aksidente, o bisan unsang emergency, ayaw pagduhaduha ug tawag sa 911. Andam ug preparado ang atong kapulisan nga motabang dayon ug sa walay pagduhaduha,” matod ni Maranan.
Kini nga lakang agi og suporta sa kamanduan ni Police General Nicolas Torre III nga nagsentro sa daling pagresponde sa mga polis sulod lang sa lima ka minutos.
“Mahal naming mga kababayan, huwag na kayong maghanap ng pulis sa presinto, sapagkat kami ay nasa inyo nang mga telepono. Tumawag sa 911, darating kami sa loob ng limang minuto,” dugang ni Maranan.
Aron nga makab-ot ang tinguha nga 5 minute response time subsob ang gihimong simulation exercise sa kapulisan sa Central Visayas.
Ang matag adlaw nga exercise makatabang sa pagsiguro nga ang kapulisan andam nga motubag sa labing paspas nga pamaagi paghatag og assistance sa nangayog panabang.
“Public safety is a shared responsibility. When we all stay alert, look out for each other, and use 911 when it counts, we help create a safer Central Visayas for everyone”, pasabot ni Maranan.
“The police are always present—ready to serve, protect, and stand with the community”, dugang niya.
Giawhag ni Maranan ang publiko nga motabang sa pagbantay sa ilang palibot nga kon dunay dautang elemento nga masigpatan motawag dayon sa 911 hotline. / AYB