Malinawon sa kinatibuk-an ang probinsya ug dakbayan sa Sugbo atol sa pag-obserbar sa Semana Santa.
Kini ang paghulagway sa Cebu Police Provincial Office (CPPO) ug Cebu City Police Office (CCPO).
Si Police Major Windell Abellana, information officer sa CPPO, niingon nga way natala nga dagkong krimen apan dunay gilusad nga dungan nga anti-criminality operations nga gisugdan sa Lunes Santo hangtod sa Miyerkules Santo.
Ang isla sa Bantayan ang gipatutokan ni Police Colonel Percival Zorilla, hepe sa CPPO, subay sa pagdagsa sa lokal ug langyaw nga mga turista.
Apan gibutyag ni Abellana nga malinawon ang kapistahan sa maong isla, way natala nga dagkong mga krimen sanglit daghang mga polis ang gipadala sa CPPO ug Police Regional Office (PRO 7).
“Wala ra ta makasugat og problema sa tibuok Semana Santa. Gani human sa Semana Santa naka focus na dayon ta sa Sugat sa Minglanilla,” matod ni Abellana.
Sa Sabado pa lang sa gabii, Marso 30, daghang mg polis ang gipadala ngadto sa lungsod sa Minglanilla aron moabag sa pagdumala sa dagan sa trapiko tungod kay napanglantawan nga mohuot ang traffic sa maong lungsod.
Sa dakbayan sa Sugbo, gipahibawo usab ni Police Lieutenant Colonel Janette Rafter, deputy city director for operations sa CCPO, nga hapsay ug mingaw ang tibuok siyudad atol sa Semana Santa.
Dugang ni Rafter nga niadtong Biyernes Santo nagdasok ang mga tawo sa Celestial Garden sa Good Shepherd, Banawa ug Tabor Hills sa Barangay San Jose.
Apan wala sila nakatala og problema gumikan kay dunay mga polis ug mga barangay tanod nga nagbantay.
Ang usa sa gipabantayan sa CCPO ang mga kandila nga gipangdagkutan sa mga simbahan ug religious sites nga peligro sa sunog apan dunay mga sakop sa Bureau of Fire Protection (BFP) ug mga personnel sa Cebu City Disaster Risk Reduction and Management Office.
“Siguro kadto lang sa safety concern na tungod sa kainit unya magdagkot baya og mga kandila but naa man pud ang BFP ug CCDRMMO daghan pud sila mga personnel gi-deploy,” matod ni Rafter.
Ang PRO 7 nag-andam usab og mga personnel atol sa Easter Sunday kon ugaling dunay nga dapit nga padalhan og polis ilabi na nga daghan sa mga tawo naa sa mga beach resort.
Gipasalamatan ni Police Brigadier General Anthony Aberin ang iyang mga sakop nga nahimo’ng malinawon ug hapsay ang pagtimaan sa Semana Santa. / AYB