PNP: Walay kagubot sa ‘Sinulog sa Carmen’

Malinawon, hapsay ug walay natala nga insidente ang kapulisan sa lalawigan sa Sugbo atol sa Sinulog sa Carmen niadtong Dominggo Enero 28, 2024.

Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin. hepe sa Police Regional Office 7, nga base sa report nga gipahibawo sa hepe sa Cebu Police Provincial Office nga si Police Colonel Percival Zorilla, way dagkong insidente nga nahitabo nga may kalabutan sa kalihukan sa Sinulog sa Carmen.

Tungod niini, ang PRO-7 nipahalipay sa mga personnel sa CPPO nga gipakatap sa Carmen alang sa pagpatuman sa hugot nga siguridad.

Sumala pa ni Pelare susamang pamaagi ang ilang gipatuman sa Sinulog Sa Carmen atol sa Sinulog Grand Parade sa Dakbayan sa Sugbo.

Nakadayeg ug nipasalamat si Pelare sa kooperasyon sa komunidad mao nga nagpabiling malinawon ang maong kalihukan.