NASIKOP sa mga operatiba sa Criminal Investigation and Detection Group (CIDG) -Mandaue City Field Unit ang 9 ka mga Chinese national nga nagpadagan og scam hub o naila sab nga Pogo operation sa sulod sa usa ka subdivision sa Barangay Alang-Alang , Mandaue alas 10:30 sa gabii, Miyerkules, Hulyo 2, 2025.
Matod ni Police Lieutenant Colonel Jerick Filosofo sa CIDG 7 nga nakadawat sila og reklamo sa usa sa mga trabahante sa maong scam hub nga usa ka 23-anyos nga Pinay nga giingong gitanggong sa sulod sa balay sa usa ka subdivision.
Matod sa reklamante nga gipugos sila sa pagpatrabano bisan supak sa ilang kabubot-on ug dili sab sila pagawas-gawason sa balay nga ilang gitrabahuan.
Tungod niini, nilusad dayon og operation ang CIDG 7 nga gitawag nila og Oplan Olea sa kasong trafficking in person sa pakig-alayon sa Mandaue City Police Office, Regional Anti-Cybercrime Unit 7 ug Department of Social Welfare and Development 7.
Sa dihang gisulod sa kapulisan ang balay naglumba sa pagpanglayat ang lima ka mga Chinese national sa bintana sa ikaduhang andana nga maoy hinungdan sa ilang pagkaangol.
Usa kanila ang nabalian sa tiil ug kamot nga naa karon sa usa ka pribadong tambalanan sa Dakbayan sa Sugbo samtang ang upat naa sa kustodiya sa CIDG 7.
Nidugang si Filosofo nga naglisod sila sa pagkuha sa detalye sa maong mga Chinese National tungod kay dili cooperative sa imbestigasyon.
Ang gihatag nga mga ID sa mga dinakpan, mga Pinoy ang pangalan ug wala sab makakuha ang kapulisan og mga dokumento sama sa mga passport nga gituohan nga gitago ra sa mga vault sa buhatan sa scam hub.
Tungod niini, makig-alayon ang kapulisan sa Department of Immigration aron makuha ang mga identity sa maong mga langyaw alang sa pagpasaka sa kasong human trafficking.
Kasamtangan nga gikustodiya sa CIDG ug RACU 7 ang 40 ka cellular phones, usa ka tablet, ug 12 ka computer sets nga gikatakdang ipaubos sa forensic examination.
Apan giklaro ni Filosofo nga mo-apply una sila og search warrant sa korte aron ila kining maeksamin aron masayran kon unsa nga matang sa scam ang gihimo sa maong mga langyaw.
“Sa nakita namin its a scam hub, kasi may mga presence ng computers, digital equipment so sa assessment namin its a scam hub pero we will request the assistance from the ACG to verify,” matod ni Filosofo. / AYB