Napili si TNT Tropang Giga guard Roger Pogoy aron maoy mopuli sa puwesto ni Phoenix Super LPG Fuel Masters guard Tyler Tio sa Philippine Basketball Association (PBA) All-Star Game nga gikatakda karong Marso 24, 2024 sa University of St. La Salle gymnasium sa Bacolod City.
Dili makaduwa sa kalihukan si Tio gumikan sa pagkaangol niini (grade 2 ankle sprain). Gibana-banang usa pa ka buwan una makabalik pagduwa si Tio.
Si Pogoy maoy napiling mopuli kang Tio gumikan kay siya ang nakakuha sa labing daghang mga boto nga gawas sa 24 ka mga magduduwa nga gipili sa fans.
Mao kini ang ikaupat nga higayon nga makaduwa ang Sugboanong si Pogoy sa All-Star Game.
Mahisakop si Pogoy sa Team Japeth nga gilangkuban nila ni Japeth Aguilar, Christian Standhardinger, Paul Lee, Calvin Oftana, Jamie Malonzo, Chris Newsome, Don Trollano, Marcio Lassiter, Arvin Tolentino, Maverick Ahanmisi, Stanley Pringle, ug Terrence Romeo.
Ikaparang sa Team Japeth mao ang Team Barroca nga gilangkuban nila ni Mark Barroca, June Mar Fajardo, Jason Perkins, CJ Perez, Robert Bolick, Jio Jalalon, Ian Sangalang, James Yap, Calvin Abueva, Jayson Castro, Gabe Norwood, Ricci Rivero, Cliff Hodge, Juami Tiongson, ug Nards Pinto. / ESL