Pogoy miapil sa training sa Gilas apan..

Pogoy miapil sa training sa Gilas apan..
GILAS: Gipaapil ang usa sa mga pambato sa TNT Tropang Giga nga si Roger Pogoy sa training camp sa Gilas Pilipinas sa Laguna apan wala pa’y kaseguroan kon mahimo ba siyang opisyal nga sakop sa pu­wersa ni coach Tim Cone nga mohamag alang sa nagkaduol nga Olympic Qualifying Tournament sa Latvia. / PBA.PH

Niapil ang Sugboanong si Roger Pogoy sa training camp sa Gilas Pilipinas sa Inspire Sports Academy sa Laguna apan wala pa’y kaseguroan kon siya ang ipuli sa naangol nga si Scottie Thompson.

Nakita si Pogoy sa ensayo sa Gilas sa reel sa Facebook page AHOSgaming sa laing Sugboanon nga si June Mar Fajardo.

Si Pogoy, kinsa usa sa mga pambato sa TNT Tropang Giga sa Philippine Basketball Association (PBA), wala naapil sa 14-man pool nga gipili ni head coach Tim Cone alang sa kampanya sa Gilas sa FIBA Olympic Qualifying Tournament sa sunod buwan sa Riga, Latvia.

Hinuon dihang nakompirmar nga dili makaduwa si Thompson tungod sa nasinati niining ang angol (bulging disc) atol sa PBA Philippine Cup, hayan gipaapil si Pogoy sa training camp sa Gilas.

Dili na sab maihap ang higayon nga nagduwa si Pogoy sa Gilas lakip na niini ang FIBA Basketball World Cup sa mia­ging tuig.

Apan niadtong Oktubre, 2023, na-diagnose si Pogoy og myocarditis nga nakahudlat sa iyang karera sa basketball.

Nakabalik pagduwa si Pogoy niadtong Enero, 2024 atol sa pag-anunsyo ni Cone sa iyang 14-man pool.

Sa kasamtangan, wala pa mobutyag ang Samahang Basketbol ng Pilipinas (SBP) o ang Gilas coaching staff kon unsa gyud ang estado ni Pogoy sa Gilas. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph