Tulo ka motibo ang gitan-aw sa kapulisan sa Siyudad sa Carcar sa pagpusil patay sa gihulagway nga asset sa polis niadtong alas 10: 45 sa gabii, Sabado, Enero 4, 2025 sa Sityo Anislagan, Barangay Guadalupe, sa maong dakbayan.
Ang gipatay giila nga si Homer Merida Rebuyas, 42, minyo nga taga-Upper Cogon, Bgry. Poblacion. 1, Carcar.
Base sa imbestigasyon sa kapulisan ubos sa pagdumala ni Lt. Colonel Ruel Burlat, nasuta nga ang biktima nagmotorsiklo ug gitaparan sa laing nagmotorsiklo dayon gipusil sa makadaghang higayon ug naigo sa nagkadaiyang bahin sa iyang lawas nga miresulta sa iyang kamatayon.
Si Burlat nagduda nga adunay durogista nga nasuko sa maong biktima ilabina nga nakatabang si Rebuyas sa operasyon sa kapulisan batok sa illegal drugs.
Padayon pa ang imbestigasyon aron sa pag-ila sa mipatay sa biktima, atol ning pagsulat. / DVG