Presinsya sa kapulisan gihangyo sa konseho nga palig-unon sa nagkalain- laing dapit sa Dakbayan sa Talisay.
Ang presinsya sa kapulisan gilantaw nga dako kaayo og ikatabang aron mapugngan ang kreminalidad.
Usa ka resolusyon ang gipasar sa konseho nga pormal nga naghangyo sa hepe sa kapulisan sa Talisay, Police Lieutenant Colonel Atty. Maila Causin Maramag, aron dugangan ang presensya sa mga pulis sa mga lugar nga sagad dunay krimen ug sa mga utlanan sa siyudad.
Giduso ang resolusyon ni Konsehal Danilo Caballero ang tsirman sa Committee on Peace and Order sa konseho.
Tumong niini, mao ang pagpadayon sa kalinaw ug kahusay pinaagi sa pagpatuman og mga lakang aron mapugngan ang paglapas sa balaod, kagubot, ug uban pang matang sa kriminalidad.
Gitumbok sa maong resolusyon ang panginahanglan nga mapugngan ang krimen ug masiguro ang kaluwasan sa mga residente ug bisita sa siyudad.
Ang pagbantay sa mga agianan ug utlanan sa Talisay City importante kaayo tungod kay kini ang mga kritikal nga lugar diin mahimong mahitabo ang mga iligal nga kalihokan sama sa smuggling ug uban pang kriminalidad.
Gidugang sa resolusyon nga ang presensya sa mga pulis makapugong o makapakunhod sa mga krimen. / VLM