Polis: 3 ka mga babaye kauban sa lolo sa motel
Nagpadayon ang pagpangita sa Mabolo Polic Station sa babaye nga katapusan nga nibiya sa motel nga gi check-inan sa 61 anyos nga lolo nga napalgan nga patay na alas 2 sa Huwebes sa kaadlawon, Hulyo 11, 2024.
Matod ni Police Major Romeo Caacoy Jr., hepe sa Mabolo police, nga ilang sutaon kon unsa gyud ang nahitabo sa sulod sa lawak samtang nagtagay sila sa lawasnon nga kalipay.
Usa sa mga polis nga imbestigador nga nihangyo nga dili nganlan nagkanayon nga sigun sa mga room lady sa maong inn nga ang room number 2 nga giabangan ni alyas Ferdie namatyan na og tulo ka mga tawo, tanan pulos giatake sa kasingkasing.
Nagtuo sila nga hilan ang lawak kay diha kanunay ang dunay makabsan sa kinabuhi.
Nibutyag usab ang mga room lady nga dili lang usa ka babaye ang gidala ni lolo Ferdie, kon dili tulo.
“Tulo ka babaye ang gidala ni Lolo, Sir, nya wala na siguro to kaagwanta, gihangos pag-ayo. Mao to ni extend siyag duha ka oras aron mopahuway ba,” matod sa usa sa mga imbestigador sa Superbalita Cebu.
Walay nakitang foul play sa lawas sa biktima apan matod ni Caacoy nga kinahanglan nga ipa autopsy nila ang lawas aron masayran unsa ang hinungdan sa iyang kamatayon.
Nakakuha og CCTV video ang Mabolo Police Station ug ilang naklaro nga tulo ka babaye ang nagdungan sa pagpanggawas sa room number 2 pasado alas 12 sa tungang gabii. / AYB