Polis: ‘Kabit kabit’ motibo sa pagpatay

SunStar Local News
SunStar Local News

Nagpadayon ang Adlaon Police Community Precinct ug Talamban Police Station sa ilang manhunt operation batok sa suspek sa pagpusil patay sa kanhi kawani sa Cebu City Hall sa Purok 1, Brgy. Cambinocot, bukiran sa Dakbayan sa Sugbo.

Gisusi sa kapulisan ang impormasyon nga bana sa babaye nga giingong gikarelasyon sa biktima nga si Jogie Goc-ong Batican, taga Brgy. Lusaran, mao ang gunman.

Tungod ning mao nga impormasyon, gipugngan una sa Superbalita Cebu ang ngan sa suspek. Si Batican dunay usa ka anak ug nagtrabaho kaniadto sa City Hall isip job order, diin sila ang tig repair sa mga karsada sa Dakbayan sa Sugbo.

Matod ni Police Major Alvino Enguito, hepe sa Talamban Police Station, nga ang biktima ug suspek managkaila ra.

Sa ilang pagpalawom sa imbestigasyon ug sigun usab sa mga pamahayag sa mga silingan sa biktima, gikarelasyon ni Batican ang asawa sa suspek nga wala lang una nganli sa kapulisan. Tungod niini, ila kini nga gitan-aw nga personal nga atraso base sa mga nanggawas nga kasayuran.

“Possible reason gyud ani is personal grudge. Dala na pud ni sa selos kay sa atong term pa gikabit ang asawa,” matod ni Enguito sa interbyo sa mga tigbalita sa Sabado, Hunyo 8, 2024.

‘MIANGKON’

Ang kapuyo sa biktima nga si alyas Edna, kinsa nahinabi sa sibyaanang dyHP RMN Cebu, nagkanayon nga nasa­yod na siya nga dunay laing babaye ang iyang kapuyo.

Niangkon, matod pa kini kaniya, dungan sa pagpangayo og pasaylo sa iyang salaod nga nahimo niini sa iyang pamilya. Gani, iya ning gireklamo sa barangay ang babaye nga asawa sa suspek.

Atubangan sa mga barangay official sa Lusaran nangayo og pasaylo ang babaye, matod ni alyas Edna. “Nanguyab daw na akong kapuyo. Nya ako siya giingnan nga unyag nanguyab, wala diay ka kahibawo nga naa kay bana? Bisag unsa pay diskarte sa laki nimo, maghuna-huna ka nga pamilyado ka, dili ka mopatol uy,” matod ni alyas Edna.

Nagsugod ang giingon nga relasyon sa duha sa Disyembre sa miaging tuig ug pagka Enero 2024 lang niya nahibaw-an gikan sa iyang kaila nga kauban sa trabaho ni Batican.

Wala silay lain nga gidudahan nga nihimo sa maong krimen mao ang bana sa gikarelasyon sa iyang kapuyo. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph