Makigbinukbokay ang polis nga boksidor nga si Jusue “Pistolero” Bastillada batok sa beteranong si Jason Tinampay sa main event sa “Bakbakan Dos” boxing event sa Big Yellow Promotions karong Abril 11, 2025, sa Barba Sports Complex sa Toledo City, Cebu.
Si Bastillada, kinsa usa ka full-time police officer, nagtinguhang masumpayan ang iyang unom ka sunodsunod nga kadaugan, nga iyang nahimo human niya nasinati ang bugtong niyang pilde batok ni Reycar Auxilio niadtong 2022.
Katapusang niaway si Bastillada niadtong Disyembre 10, 2024, diin nidaog siya pinaagi sa unanimous decision batok ni Paolo Fortun.
Si Bastillada, 35, kinsa taga Dakbayan sa Sugbo, adunay 9-1, 5KOs nga rekord samtang si Tinampay, 30, kinsa lumad nga taga Dagohoy, Bohol, adunay 14-20-2, 11KOs nga rekord.
Aduna pa’y ubang mga away ang masaksihan sa promosyon. / EKA, ESL