Namatay ang usa ka polis human mibangga sa punoan sa kahoy samtang nagmaneho sa iyang motorsiklo, alas 2:30 sa kaadlawon sa Dominggo, April 27, 2025, duol sa headquarter sa Cebu City Police Office (CCPO) sa Gorordo Avenue, Barangay Kamputhaw sa Dakbayan sa Sugbo.
Si Police Corporal Ridrid Ordiñeza Castañeda, 35, dunay kapuyo, taga Upper Pakigne Spring Village, lungsod sa Minglanilla ug nadestino sa Sawang Calero Police Station 6 sa CCPO, patay na’ng nadangat sa tambalanan.
Ang biktima sakay sa iyang motorsiklo nga Yamaha Mio Aerox padulong na mopauli gikan nga ni-duty sa Simultaneous Anti-Criminality Law Enforcement Operations (SACLEO), apan pag-abot sa maong dapit misarasay ang motorsiklo tungod sa kadangog sa karsada mugna sa pagbundak sa uwan hinungdan nga nabangga sa punoan sa kahoy atubangan sa Colegio de la Inmaculada Concepcion.
Nabuwag ang biktima sa iyang motorsiklo tungod sa kakusog sa impact.
Samtang nabuak usab ang helmet nga iyang gisul-ob.
Gidali siya sa pagdala sa Barangay Ambulance sa Kamputhaw ngadto sa Cebu City Medical Center apan gideklarar nga dead-on-arrival. / GPL, AYB