Polis nga hubog gireklamo sa American national nga nanumbag sa iyang gusok niadtong Lunes, Agusto 11,2025, gawas sa merkado sa Lungsod sa Guindulman, Lalawigan sa Bohol.
Ang gipa-blotter sa Guindulman Municipal Police Station mao si Police Corporal Marcelo Olaer nga gireklamo sa ginganlag Kenny Foster.
Sumala sa post ni Foster sa iyang Facebook, samtang nagpadaplin siya sa motorsiklo, gitukmod siya ni Olaer kinsa hubog ug gikuptan ang iyang armas. Gisigihan og singgit ug gi-dirty finger siya ni Olaer samtang nagkugos ang asawa sa ilang lima ka bulan nga anak. Sa dihang giprotektahan niya ang asawa, gisumbag siya ni Olaer sa gusok.
Bisan nanawag siya sa 911 ug nangabot ang ubang mga polis, nagpadayon gihapon si Olaer sa pagsinggit-singgit kaniya.
Gibutyag ni Police Lieutenant Colonel Norman Nuez sa Bohol Police Provincial Office (BPPO) nga gimanduan na nila ang hepe sa Guindulman nga kuhaon ang affidavit ni Foster aron mapasakahan si Olaer og criminal ug administrative case.
Dili kini unang higayon nga naapil si Olaer sa kontrobersiya tungod kay sa tuig 2020 gipasakahan sab siya og kaso sa dihang gipabuto niya ang iyang armas tungod sa kahubog.
Tungod niadto, gi-demote siya gikan sa pagka-Police Master Sergeant ngadto sa pagka-Corporal ug gisuspenso.
Giangkon ni Nuez nga si Olaer buotan kon dili hubog apan mausab ang kinaiya kon makainom ug mokuha dayon sa iyang armas.
Samtang gipaabot pa ang imbestigasyon, gikuhaan si Olaer sa iyang service nga long ug short firearms ug posibleng ibalhin sa Camp Dagohoy.
Gihimo sab sa Provincial Internal Affairs Service ang ilang kaugalingong imbestigasyon. / AYB