Polis nagpositibo sa drugas mi-AWOL
Nadiskubrihan nga positibo sa ilegal nga drugas ang usa ka polis sa dihang giusab ang schedule sa regular drug testing sa mga sakop sa Lapu-Lapu City Police Office (LCPO).
Ang maong polis wa na motunga sa iyang trabaho kon nag-absent without official leave (AWOL).
Atol sa kinalit nga drug test niadtong buwan sa Mayo nga kabahin sa kampanya sa internal cleansing sa han-ay sa kapulisan, usa ka operatiba sa intelligence nga nagranggo og police corporal ang inisyal nga niguwa nga nagpositibo sa ilegal nga drugas.
Atol sa confirmatory test, positibo gihapon ang resulta.
Sa naunang pamahayag sa tigpamaba sa LCPO, Lt. Col. Christian Torres sa SunStar Cebu niadtong Hunyo 30, 2025, nga sa naandan gihimo sa matag adlaw’ng Lunes ang sinemana nga drug test, apan nabantayan na ang maong skedyul hinungdan nga makapangandam ang mga personnel.
“Di na every Monday kay pattern nato sauna as part sa among internal cleansing gyud kay ang Monday ma-pattern na maong among iusab og day…Naay uban mugamit ocassionally ra mawa sa ilang system after 24 hrs,” matod pa ni Torres.
Iya sab nga gipasabot nga base sa standard procedure, ang usa ka polis nga inisyal nga nagpositibo sa resulta sa drug test hatagan og 15 ka adlaw aron nga ma-correct ang naunang resulta, pinaagi sa pagpadala og sample sa ihi alang sa re-testing ngadto sa Manila, ang maong procedure himuon atubangan sa chemist.
Apan ang maong polis (wa nganli) wa mopaubos alang sa re-testing sud sa gihatag nga tagal.
AWOL
Ang buhatan sa LCPO ang nipadala na og Notice to Return to Work sa maong polis dihang wa na kini mo-duty.
Sa higayon nga dili na motunga ang maong personnel isuspenso ang iyang suholan ug dugang disciplinary actions ang ipahamtang ngadto kaniya.
Ang maong polis mag-atubang og kaso nga Conduct Unbecoming of a Police Officer ug AWOL. Sa tuig 2025, kini maoy ikaduhang kaso sa polis nga nagpositibo sa drugas kinsa gitangtangan sa suholan gumikan sa iyang AWOL status.