Patay ang usa ka polis samtang angol ang traffic officer nga naligsan sa pribado nga sakyanan sa M. Cuenco Ave. eskina dan J. Panis, Barangay Kasambagan, dakbayan sa Sugbo, alas 4:38 sa buntag, Dominggo, Disyembre 1, 2024.
Ang biktima giila nga si Carlo Tachado Bayato, 28, sakop sa Philippine National Police (PNP) nga usa ka residente sa Barangay Cubacub, siyudad sa Mandaue.
Sa imbestigasyon sa Traffic Enforcement Unit (TEU) sa Cebu City Police Office (CCPO) nga samtang nagdumala sa traffic si Cesar Silva, 31, sakop sa Cebu City Traffic Operations Management (Citom) subay sa nagpadayon nga fun run, kalit lang siya nga nabanggaan ni Bayato nga nagmaneho sa iyang Yamaha NMAX nga maoy hinungdan nga silang duha pulos nangatumba sa karsada.
Samtang, ang usa ka Hyundai sub-compact sports utility vehicle (SUV) gikan sa IT Park nga gimaneho ni Luziane Marron Uy Ty, 22, residente sa Estelle Woods Residences Block 5 Lot 2, dan Pine, Barangay Talamban, siyudad sa Sugbo, ni-left turn apan wala makabantay sa duha nga pulos naa pa natumba sa karsada.
Gidaro sa SUV ang natumba nga motorsiklo ug nalatayan ang lawas sa polis.
Dali nga naabot ang medical team ug gitabang ang polis ug ang traffic officer ug gipangdala sa Cebu City Medical Center apan gideklarar si Bayato nga dead on arrival (DOa) tungod sa kadaot nga nahiagoman niini sa lawas.
Gitanggong sa TEU sa CCPO si Ty ug mag-atubang kini og kasong reckless imprudence resulting in homicide and physical injury ug damage to property. / AYB