Patungpatong nga mga kaso ang atubangon sa duha ka mga polis nga sakop sa Regional Highway Patrol Unit-Bangsamoro Autonomous Region (RHPU-BAR) human nasikop sa entrapment operation sa PNP Integrity Monitoring and Enforcement Group (Imeg) sa Zone 1, PC Hill Barangay Rosary Heights 1, sa Cotabato, alas 6:15 sa gabii sa Biyernes, Abril 12, 2024.
Matod ni Imeg Mindanao Field Unit Acting Chief Lieutenant Colonel Aldrin Abila, sa buhatan mismo sa RHPU-BAR nila gihimo ang operasyon batok sa lima ka mga polis nga nalambigit sa robbery extorion.
Malampusong nasikop ang usa sa mga suspek nga giilang si Police Master Sergeant Nassrollah Gani.
Sumala ni Abila nga nakadawat sila og reklamo gikan sa usa ka indibidwal human na-impound ang iyang Honda Civic nga sakyanan tungod sa ilegal nga pagbalhin sa mga plaka.
Nipasangil ang reklamante nga lima ka mga sakop sa RHPU ang nangayo kaniya og P50,000 bugti sa pagbawi sa iyang sakyanan.
Narekober sa pagronda sa Imeg-PNP gikan kang Gani ang P18,000 nga cash, duha ka cellular phones, Toyota Wigo keys, usa ka Zigana PX-9 caliber 9mm pistol, usa ka 9mm live ammunition, usa ka Galil Rifle, usa ka magazine sa Galil rifle, ug 28 ka mga bala.
Samtang, ang iyang kaubang si PEMS Benigno Mercado nakaangkon og samad sa lawas human niambak gikan sa hagdanan sa RPHU kay nalisang sa pagronda kanila.
Bisan og wa siya malambigit sa kasong robbery extortion, giklaro ni Abila nga pasakaan gihapon siya og kasong direct assault human gipabuthan ang operating units.
Sa pikas bahin padayon pang gipangita ang upat ka mga kauban ni Gani. / Superbalita Davao