SAMAD pinusilan ang naangkon sa polis nga nadestino sa Cebu Police Provincial Office (CPPO) human nga aksidente nga nibuto ang iyang service firearm niadtong alas 9:19 sa buntag, Martes, Hulyo 8, 2025 sa Sitio Ukban, Barangay Buhisan, Siyudad sa Sugbo.
Ang maong polis nga nakabsan sa iyang kinabuhi resulta sa maong aksidente giila nga si Police Corporal Edmund Danieles Agustin, 33, residente ra sab sa maong lugar ug nadestino sa Provincial Investigation and Detective Management Unit sa CPPO.
Matod ni Police Lieutenant Colonel Maria Theresa Macatangay, Deputy City Director for Operation sa Cebu City Police Office nga samtang gikuha ni Agustin ang iyang 9mm caliber pistol nga issue sa PNP, kalit kining nibuto ug nitama ang bala sa iyang tiyan.
Gidudahan nga posible’ng nasangit sa pantalon sa dihang gihulbot ang armas nga gitakin sa hawak.
Gidala si Agustin sa iyang kabanay sa Vicente Sotto Memorial Medical Center apan gideklarar nga dead on arrival.
Gibutyag ni Macatangay nga base sa mga nakuha nila nga CCTV footage, makita nga nag-inusara lang ang biktima nga nisulod sa ilang balay kay ang anak niini anaa sa tunghaan samtang nilakaw sab ang iyang asawa.
Giklaro ni Macatangay nga wala silay nakitang foul play sa kamatayon sa maong polis ug aksidente ang nahitabo. / AYB