Nabalhog sa Abellana Police Station ang usa ka polis nga nadestino sa usa ka national support unit sa Philippine National Police (PNP) sa Central Visayas human nanion og armas ug nanghulga sa iyang kaubang polis, pasado alas 10 sa gabii sa Miyerkules, Abril 24, 2024, sa dalan Uytengsu, Barangay Sambag 1, dakbayan sa Sugbo.
Ang suspek giila nga si Police Cpl. Louie Nepomoceno Sequito, 29, lumad nga taga Iloilo City apan kasamtangan nga nagpuyo sa Sambag 1, nadestino sa Central Visayas.
Samtang, ang giingong iyang gitiunan sa armas ug gihulga nagranggo gihapon og patrolman nga si Zusime Brix Cañete Peñaflor, 25, taga dakbayan sa Bacolod, nag-abang og balay sa Barangay Sambag 2, dakbayan sa Sugbo.
Matod ni Police Major Mark Don Alfred Leanza, hepe sa Abellana Police Station sa Cebu City Police Office (CCPO), nga nigawas sa gipuy-an ang biktima aron mo-withdraw og kuwarta sa automated teller machine (ATM).
Sa iyang paggawas, nakita niya ang classmate nga nag-inom ug gitawag siya niini aron moapil sa ilang tagay.
Niduol kini ug niinom sa duha ka baso nga ilimnong makahubog nga gitagay apan nananghid nga molakaw kay mag-withdraw.
Apan wa makabantay ang biktima nga gisundan siya niini ug pag-abot sa Uytengsu, gisumbag siya tumong sa ulo ug dayong bunot sa armas ug gition ngadto kaniya.
Human sa insidente, nireport ang biktima sa police station ug dali nga gialarmahan sa Abellana Police Station uban sa Special Weapons and Tactics ug City Mobile Force Company ug naabtan nila nga nag-inom pa.
Nakuha sa kapulisan ang issued firearm sa PNP nga 9mm pistol ug magazine niini nga dunay 17 ka bala.
Gipusasan ang suspek ug gidala sa Abellana Police Station 2 ug mag-atubang og kasong physical injuries ug grave threats ug laing kasong administratiba nga posibling iyang ikataktak sa serbisyo sa PNP. / AYB