Polis nga nakadakop sa nanukmag, pasidunggan

Polis nga nakadakop sa nanukmag, pasidunggan
Image from Google Street View

Hatagan og pasidungog sa hepe sa Cebu City Police Office (CCPO) ang duha ka mga polis nga nakadakop sa usa ka lalaki nga nanukma’g sa tulo ka maanyag nga mga babaye niadtong Dominggo sa hapon.

Pasidunggan sa CCPO mao sila si P/Patrolman Jurdine Franco ug P/Patrolman Johncelle Francisco nga mga sakop sa Abellana Police Station.

Matod ni Police Colonel Ireneo Dalogdog , hepe sa CCPO, nga nabatasan na niya nga kon dunay makahimo’g kalampusan, hatagan kini og pasidungog aron mosaka usab ang morale sa mga personnel ug mogana sa trabaho.

Gawas niini, mahimo usab ni nga sulondon sa ubang mga polis nga kon makahimo sila og dako nga accomplishment, dunay nagpaabot nga pasidungog gikan sa ilang labaw.

Niawhag si Dalogdog sa mga Sugboanon nga kon dunay krimen nga mahitabo sa ilang palibot, labing maayo nga motawag dayon sa hotline sa kapulisan aron dali nga marespundehan ug madakpan ang naghimo sa krimen.

Samtang, hingpit nga nadestino sa Police Regional Office (PRO 7) ang kapin sa 100 ka mga polis gikan sa Regional Mobile Force Battalion 7 ngadto sa CCPO aron makatabang sa pagpatunhay sa kahusay ug kalinaw sa dakbayan.

Gipahibawo ni Dalogdog nga ang maong mga personnel maoy giabag sa City Mobile Force Company nga mag beat patrol ug police visibility.

Bisan kon kuwang pa kini itandi sa gidaghanon sa populasyon sa dakbayan sa Sugbo, apan makatabang na kini sa paggukod sa mga kriminal.

“Ang atong regional director naningkamot gyud nga iyang i beef up ang security diri sa Siyudad sa Sugbo. Sa pagkakaron, duna silay gidagdag nga PNP personnel para dugang siguridad sa dakbayan,” matod ni Dalogdog.

Ang CCPO sa pagkakaron adunay kapin sa 1,300 ka personnel nga maoy mobantay sa kapin usa ka milyon ka mga residente sa siyudad. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph