Giimbarguhan na sa iyang service firearms ug tsapa ang polis nga hubog nga nisulod sa buwangan sa Lungsod sa Sogod, Probinsiya sa Sugbo nga nag-wild ug nakig-away sa usa ka retired police ug nisumbag pa sa niresponde nga polis.
Ang insedente nahitabo niadtong alas 4:10 sa hapon, Miyerkules, Hulyo 23, 2025, sa Bawo Cockpit Arena, Barangay Bawo.
Si Police Captain Don Blance Tabares, information officer sa Cebu Police Provincial Office, nitug-an nga kasong criminal ug administratiba ang atubangon sa nagmaoy nga polis nga nagranggo og corporal nga sakop sa Talisay City Police Station nga taga Barangay Ampungol, Lungsod sa Sogod.
Nasayran nga ang tigdumala sa buwangan nga si Cresente Roble nangayo og police assistance sa dihang nagkagubot.
POLIS VS. POLIS
Niresponde ang mga personnel sa Sogod Police Station nga gilangkuban nila ni; PEMS Gregorio A. Geramis, PSMS Christopher C. Romarate, PCpl Nikko M. Velasco, Pat Jose P. Cejano Jr., ug Pat Skim P. Cometa.
Sa pag-abot sa area, nagpaila sila nga mga polis apan nanumbag na hinuon ang police corporal nga hubog ngadto ni Corporal Velasco nga naigo sa wala nga nawong.
Nanghagad pa kini og sinumbagay sa usa ka retired PNP personnel nga namusta sa maong buwangan.
Ang kasong criminal gumikan sa direct assault sa dihang iyang gisumbag ang polis nga niresponde, alarm and scandal ug ang administratiba subay sa iyang pagkapolis nga nisulod sa usa ka sugalan.
Nipasabot si Tabares nga ang tanang polis hugot nga gidid-an nga mosulod sa mga buwangan o bisan unsa nga pasugalan sanglit mamahimo sila nga mataktak sa serbisyo.
“As to the action sa CPPO nag estorya nami ni PD Police Colonel Christopher Bermudez naa siya’y pronouncement nga walang puwang ang pasaway na police sa CPPO, we do not condone the behavior of our personnel,” matod ni Tabares. / GPL / AYB