USA sa mga polis nga miresponde og armed person alarm sa dalan P. Del Pilar sa Barangay Población, Dakbayan sa Danao, ang nakabsan sa kinabuhi sa dihang napusilan sa suspek, samtang namatay usab ang naulahi alas 12:20 sa udto, Biyernes, Hunyo 27, 2025.
Ang polis nga nalandig sa tambalanan mao si Police Patrolman Mark Gomer Ornopia, sakop sa Danao City Police Station.
Gibawi-an kini sa iyang kinabuhi pipila ka minutos human gidala sa tambalanan.
Sa pagkutlo ning balita, wala pa mailhi ang suspek nga nakabsan usab sa iyang kinabuhi sa sulod sa tambalanan.
Sa inisyal nga impormasyon sa Cebu Police Provincial Office (CPPO), nga nangilog og armas ang suspek sa usa ka gwardya sa usa ka establisamento sa maong dapit.
Ang mga tawo nga naa sa palibot nag-alibwag sa pagpanagan ug pipila kanila ang mipahibawo sa mga personnel sa Bureau of Jail Management and Penology (BJMP) nga naa sa korte ug sa police nga naka-duty niadtong tungora.
NITUBAG SA ALARMA
Dali nga naabot ang biktima nga si Ornopia nga naka-duty sa korte uban sa mga BJMP personnel nga dunay gidala nga Person Deprived of Liberty (PDL) sa korte apan sa dihang gigukod nila ang suspek giunhan sila sa pagpusil gamit ang armas nga giilog niini sa gwardya.
Naigo sa agtang ang biktima ug mibawos usab sa pagpusil ang mga sakop sa BJMP sa suspek nga miresulta sa pagka-igo sa lawas niini.
Dali nga gidala ang biktima sa tambalanan sakay sa usa ka motor apan gideklara kini sa mga doctor nga patay pipila ka gutlo ang nakalabay, samtang ang suspek dead on arrival usab sa susamang tambalanan.
Matud ni Police Captain Dun Blane Tabares, ang information officer sa CPPO, nga base sa inisyal nga imbestigasyon sa Danao City Police Station, nga ang gwardya sa Golden Crest Pawnshop ang iyang giilogan sa armas.
Human niya mailog gitionan niya kini ug gikablit apan wala makabuto nga maoy hinungdan nga midagan kini palayo sa pawnshop. / AYB