Kadtong polis nga gireklamo sa usa ka langyaw sa Guindulman, Bohol nga nanghulga ug nanumbag kaniya sa gawas sa merkado ang nadakpan na sab alas 5:30 sa buntag, Miyerkules, Agusto 13, 2025, human mangilog og armas sa guwardiya sa usa ka convenient store.
Ang polis giila nga si Police Corporal Marcelo Olaer alyas Siloy, 51, sakop sa Guindulman Municipal Police Station nga nagpuyo sa Purok 3, Barangay Casbu, Lungsod sa Guindulman, Probinsiya sa Bohol.
Nakuha sa mga polis ang kalibre 9mm Luger MOD TEC-KG9 nga dunay duha ka magazine nga walay sulod nga bala ug usa ka wala makabuto nga bala ug laing 9mm pistol.
Lakip sa nasakmit ang 12 ka bala sa 9mm, upat ka slug, ug 8 ka basiyo sa 9mm pistol ug ubang ebidensya.
Sa imbestigasyon sa kapulisan nga dunay nanawag sa ilang buhatan labot sa insidente sa pagpangilog og armas sa usa ka guwardiya sa convenient store sa Barangay Sawang sa maong lungsod.
Dali nga nisakay og motor ang suspek palayo sa dapit.
Matod sa guwardiya nga samtang nag-duty siya kalit lang naabot ang suspek sakay sa Suzuki raider 150 color itom ug green nga motorsiklo dayong imbargo sa iyang armas.
Pipila ka minuto ang nakalabay samtang nilusad ang kapulisan og manhunt operation, nakadawat na sab og report ang Guindulman Police Station nga dunay namusil og balay sa Purok 5 Barangay Guinacot sa maong lungsod nga dali nila nga giadto.
Sa pagresponde sa kapulisan ilang nahinabi ang tag-iya sa panimalay ug niingon nga pugos nga nisulod sa ilang gate ang suspek ug gipamusil ang ilang iro lakip na ang ilang balay nga niigo sa ilang pultahan ug bildo nga bintana.
Nagtuo ang suspek nga mao kadto ang balay sa langyaw nga iyang naengkuwentro sa gawas sa merkado sa lungsod.
Dinhi na nadakpan ang suspek sa dihang padung na unta siya nga mosibat ug nakuha gikan kaniya ang mga ebidensya.
Si Olaer kasamtangan nga gidala sa Bohol Police Provincial Office sa camp Dagohoy sa Dakbayan sa Tagbilaran ug giandaman na og kaso sa kapulisan.
Matod ni Police Colonel Arnel Banzon, hepe sa Bohol Police Provincial Office nga magpatong-patong ang kaso nga ilang ipasaka batok sa iyang personnel.
Kini naglangkob sa Robbery, Frustrated Murder, kalapasan sa Republic Act 10591 o Illegal Possession of Firearms and Ammunitions ug violation of Domicile.
Gawas niini nag atubang sab siya og reklamo nga Grave Threats human gikiha siya sa usa ka langyaw sa Guindulman nga iyang gihulga nga pusilon.
Niadtong Miyerkules nipagawas og kamanduan si Banzon nga relibuhan sa katungdanan si Olaer ug ibalhin siya sa Provincial Personnel Holding and Accounting Section apan nagtinguha na man hinuon siya nga manimawos sa langyaw nga nireklamo batok kaniya. /