Gipasidan-an sa Department of Education (DepEd) sa Central Visayas ang mga politiko ug mga kandidato sa umaabot eleksyon nga dili gamiton sa ilang kampanya ang graduation rites.
Si Dr. Salustiano Jimenez, DepEd 7 director nitug-an sa SunStar Cebu niadtong Martes, Abril 8, 2025, nga samtang ang mga public school dili makapugong sa mga opisyal o mga kandidato nga alumni nga magsilbing guest apan gidid-an sila nga mangampanya sa ilang diskurso atol sa graduation rites.
Gihangyo ni Jimenez ang mga politiko nga dili mopahimulos atol sa seremonyas pinaagi sa pagpangampanya o pag-endurso og mga kandidato sa ilang inspirational message ngadto sa mga graduate.
“Dili sila mo diskurso nga nilansar ko, ako botari ug unsa pa,” matod ni Jimenez.
Ang pasidaan giluwatan samtang ang mga public school nangandam sa pagtapos sa 2024–2025 academic year nga dunay daghang graduation ceremonies nga gitakda sa April 14 ug 15 alang sa kindergarten, Grade 6, 10 ug 12 students.
Matod ni Jimenez nga sa nangagi, dili kalikayan nga imbitahon ang mga incumbent official ug mopaambit og mga mensahe.
Tungod niini, iyang giawhag ang mga politiko ug mga kandidato nga dili lang sa motambong sa mga graduation ceremony kon ila kining gamiton sa pagpangampanya kay basin mapasanginlan sila nga nag-electioneering nga kalapasan sa eleksyon.
“I really appreciate some LGUs (Local Government Units) nga naa mi mga regional events and academic activities kay pag-attend nako moingon dayon si mayor willing mo-attend unta pero naay delicadeza nga dili na lang siya mo-attend kay tungod sa election,” matod ni Jimenez.
Matod niya nga ang mga incumbent official ug mga kandidato dunay laing paagi sa pagpangampanya ug ang mga kalihukan sa DepEd 7, wala maapil.
Iyang gidugang nga ang mga diskurso sa mga politiko atol sa graduation dili nila ma-review ug aron kalikayan nga mapasanginlan silang dunay gipaboran, mas maayo nga dili na lang mopakita.
“Mas maka-cause lang ni og isyu kay kon atong pangayuon ang speech ug dili gihapon mao ang i-speech kay impromptu, maka-cause na nuon ni og doubt sa (neutrality) sa atong mga personnel,” matod ni Jimenez.
Lakip sa iyang gipasidan-an ang mga magtutudlo ug mga non-teaching personnel nga di mangampanya og mga kandidato aron di sila mapasanginlan nga nag-apilapil sa kampanya.
Matod ni Jimenez nga bisan si kinsa mahimong mosuwat sa Commission on Election (Comelec) batok sa mga incumbent official o mga kandidato nga mogamit sa graduation ug moving-up rites sa pagpangampanya.
Kon dunay mga campaign material nga gipamutang duol sa public schools, matod ni Jimenez nga ang motangtang niini mao ang mga personnel sa Comelec. / EHP