Pope Francis nakagawas na sa ospital

Pope Francis nakagawas na sa ospital
AP
Published on

Nabalik na sa Vatican si Pope Francis niadtong Domingo, Marso 23, 2025, human sa lima ka semana nga pagkaospital tungod sa sakit nga pneumonia ug sa iyang pagpauli nihapit siya sa iyang paboritong basilica.

Ang Papa gitambagan nga mopahuway sulod sa duha ka buwan aron nga hingpit nga maulian sa iyang balatian.

Sa iyang pag-abot sa Perugino gate sa Vatican City nahupay ang kabalaka nga sa iyang kondisyon diin taas nga panahon sulod sa ospital hinungdan nga nitumaw ang posible nga papal resignation.

Sa pagbiya gikan sa Gemelli Hospital, ang convoy ni Pope Francis midiretso sa St. Mary Major Basilica diin nitunol og buwak ngadto sa cardinal sa basilica aron ihalad sa imahe nga Salus Populi Romani. Kini nga Byzantine-style nga imahe giila nga paborito sa Papa ug una nang namahayag sa iyang tinguha nga malubong duol sa maong dapit.

Sa wala pa kini, si Pope Francis nagpakita sa publiko sa unang higayon sulod sa lima ka semana diin siya naghatag og thumbs-up ug nagpaambit og gamay nga panalangin gikan sa usa ka bintana sa ospital. Liboan ka tawo ang nagtapok diin og nananggit og ‘Viva il Papa!’ ug ‘Papa Francesco’ lakip na ang mga pasyente ang nanggawas aron lang makakita kaniya.

Ang mga doktor nag-ingon nga ang Papa nagkinahanglan magpahulay sulod sa duha ka buwan ug likayan ang pagtambong og mga tigom.

Apan gilauman nga mobalik siya sa iyang regular nga mga buluhaton paglabay sa pipila ka panahon.

Sa iyang pagpauli, nahupay ang mga tawo sa Vatican ug mga Katoliko sa tibuok kalibutan human sa 38 ka adlaw nga pag-antos sa ospital.

Sa Vatican, wala’y espesyal nga mga preparasyon sa iyang balay sa Domus Santa Marta.

Si Pope Francis magpadayon sa pagdawat og supplemental oxygen ug 24-oras nga medikal nga pag-atiman kon gikinahanglan.

Wala pay kompirmasyon o siguro ang iyang mga kalihukan sa dihang nagdumili sa pagtubang ang tigpamaba sa Vatican, Matteo Bruni lakip na ang usa ka gikatakdang audience kauban si King Charles III sa Abril 8 ug ang iyang posible nga partisipasyon sa mga Easter services sa kataposan sa buwan.

Apan gilauman nga kon moayo siya, mahimo siyang mobiyahe sa Turkey sa katapusan sa Mayo alang sa usa ka ecumenical anniversary.

Kahinumduman nga si St. John Paul II dunay labing taas nga pagkaospital sa 1981 sa sulod sa 55 ka adlaw, ang kasinatian ni Francis nagpahinumdom sa kalisod ug kalig-on sa pagpangandam sa mga katigulangan sa simbahan. Nagpabilin karon ang katawhan sa pag-ampo alang sa iyang hingpit nga pagkaayo. / AP

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph